5 أدوات هتخلي حياتك أسهل لو كنت فريلانسر

5 أدوات للفريلانسر

شغلك كفريلانسر كل يوم بيبقي أسهل لأن في كم هائل من الخدمات والمواقع اللي بتهتم بتقديم خدمات مخصصة للفريلانسرز

لقيت ناس كتير بتسألني عن إيه الأدوات اللي ممكن تفيدهم كفريلانسرز لقيت أنى من الأفضل أنزلهم في مقال منفصل علشان الفايدة تكون للكل.

في البداية الأدوات والمواقع اللي ممكن تفيدك كفريلانسر كتير جداً وكل تخصص ليه أدوات خاصة بيه

بس انا هتكلم عن أهم 5 أدوات من وجهة نظري وبستخدمهم بشكل يومي من 2015 لحد النهاردة ومعتقدش إنى في يوم ممكن أوقف استخدامهم، ترتيبهم على حسب الأهمية:

 حفظ إلي بنترست

1- Rescue Time

أهم حاجة بالنسبالك كفريلانسر هي الوقت، الوقت ثم الوقت!

وقتك هو أهم حاجة،

لازم تعرف كويس جداً إيه اللي بيستهلك وقتك ومفيد وإيه اللي بيشتتك ولازم تبعد عنه، أفضل أداة بستخدمها لإدارة الوقت هي Rescue Time

ببساطة هي أداة بسيطة بتحملها وتشغلها وبتنساها! بتراقب الوقت اللي بتقضيه وأنت بتستخدم الكمبيوتر بتاعك وبتحسبلك على أساسه نسبة الـ Productivity (الإنتاجية) وبتعرف انت قضيت كام ساعة في الشغل وكام ساعة على فيسبوك مثلاً 😂

وبتساعدك في إنك تحط أهداف سواء لزيادة نسبة إنتاجيتك أو لتقليل الوقت اللي بتضيعه على السوشيال ميديا 😉

* الأداة مجانية تماماً وتقدر تحملها من الموقع الرسمي

 حفظ إلي بنترست

2- Wunderlist

تاني أداة هي Wunderlist، انا شخصياً جربت كتير جداً من أدوات الـ To-do-list

ولكن من بعد ما استخدمت Wunderlist نسيتهم أصلاً تقريباً!

في رأيي هي أفضل أداة تنظيم مهام ممكن تستخدمها في حياتك،

وأحلي حاجة فيها إنها متوافرة تقريباً على كل المنصات Windows، Mac، Android، iOS

يعني هتقدر تضيف مهام جديدة وتنظمها وترتبها من أي مكان وفى أي وقت وتوصلها كمان من أي مكان.

الجميل فيها إن عملية إضافة التاسكات أو المهام اليومية سريعة جداً ومش بتاخد ثواني وبتحدد منها انت عملت إيه والمفروض تعمل إيه بضغطة واحدة ومن غير أي تعقيد.

الاستخدام الأمثل ليها من وجهة نظري إنك تعمل ليست خاصة بكل عميل وتطلب منه يضيفلك الشغل اللي المفروض تعمله في الليست دي،

دا هيوفر عليك الوقت الكتير اللي بيضيع في الكلام مع العملاء علشان تعرف تفاصيل المهام ومواعيد تسلميها وهكذا.

* الأداة مجانية للاستخدام الشخصي وبـ4.99$ للشركات للتحميل

تحديث: من فترة فريق Wunderlist طور أداة أكثر جمالاً وسلاسة تحت اسم Microsoft To-Do وهي متاحة لـ iPhone & Android & Windows وفيها نفس مميزات Wunderlist بس بتصميم سلس أكتر وأداء أفضل، ومجانية تماماً تقدر تعرف أكتر عنها أو تجربها من هنا

3- مصاريف

من أهم الحاجات بالنسبالك كفريلانسر هي إدارة حياتك المالية!
 أو خلينا نقول أنها حاجة مهمة لأى حد سواء فريلانسر أو لأ بس الفريلانسرز تحديداً بتفرق معاهم النقطة دي جداً 👌

الغريب انى من 2015 جربت أدوات كتير جداً بتراقب بيها مصروفاتك ودخلك وبتساعدك في تنظيمهم لحد ما بالصدفة جربت مصاريف

التطبيق دا يعتبر أهم حاجة بالنسبالى، وعلى الرغم من إن مطورينه عرب وسعوديين تحديداً إلا أنه تفوق على أي تطبيق تاني منافس ليه برأي كتير من الناس،

اسهل UI ممكن تتعامل معاه في تطبيق وبيديلك إحصائيات عن مصاريفك بالكامل وإيه الدخل المناسب لنمط حياتك ومميزات كتير جداً،

أنصحكم تجربوه وتعرفوها بنفسكوا وهتلاحظوا فرق كبير في حياتكم المالية

* التطبيق مجانى تماماً وتقدر تحمله من موقعهم الرسمي

4- Dropbox

كفريلانسر انت بتبعت وتستقبل كم كبير من الملفات علشان تشتغل عليها أو تبعتها بعد ما خلصت.

انك تعمل دا في إيميلات أو Upload servers هيكلفك كتير من الوقت والمجهود في كل مرة بتحتاج تعمله، وهنا بيجي دور Dropbox 

اللي باختصار بيسهل عليك العملية دي بشكل كبير،

ببساطة بتطلب من العميل، إنه يبعتلك الملفات عليه وبتضيفها انت عليه بعد ما تخلص شغل وبتوصله في نفس الوقت،

هتوفر عليك كتير من الوقت اللي بيضيع في مواقع الـ Uploadأو الـAttachments في الإيميلات وكمان هتضمن أن شغلك يفضل موجود عليه دايماً علي عكس We Transfer علي سبيل المثال وتقدروا تستخدموه كفريق عمل بنفس الفعالية.

على الرغم من إيه بيديلك مساحة تخزينية أقل من Google Drive مثلاً

إلا إني لاحظت على مدار 3 سنين إن كل العملاء اللي بتعامل معاهم بيفضلوه لسهولة استخدامه

وانا شخصياً فضلته لأنه بيعمل تنبيهات في نفس الوقت اللي بيتم إضافة ملف جديد ودا اللي مش بيعمله Drive

* مساحة تخزينية 2جيجا مجاناً للتحميل

 حفظ إلي بنترست

5- Mindmeister

أنا متأكد إن من أكتر الحاجات المزعجة بالنسبالك كفريلانسر هي إنك بتتعامل مع كم كبير من العملاء في نفس الوقت وكم أكبر من المهام!

بالتالي تفكيرك بيكون مشتت بين كل مهمة والتانية وإيه اللي المفروض يتعمل ولمين 😥!

عشان كدا ترتيب أفكارك وإيه اللي بيحصل في دماغك المفروض يكون برا دماغك علشان دماغك وظيفتها التفكير والأبداع مش الاحتفاظ بالمعلومات لفترات قصيرة.

أنسب حاجة انا كنت بعملها هو أسلوب الـMind Map

 يعني برسم خريطة للي بيدور في بالى عن المهمة وبكتبها في ورق وبسيبها قدامي وانا شغال علشان اشتغل بشكل منظم أكتر وأتأكد إنه مفيش أي أخطاء.

Mindmeister بيعمل تقريباً نفس الشيء بنفس الطريقة كل الفرق أنه بيعمله ديجيتال

ودا بيوفرلك وقت أكبر وبيديلك مرونة أكتر في التعديل علي أفكارك وترتيبها بالشكل اللي حابب تشتغل بيه وإيه اللي خلصته وإيه اللي لسا ومميزات كتير أفضل من إنك تستخدم الورق أو الطرق التقليدية.

*مش هتحتاج أكتر من الأدوات المجانية على موقعهم الرسمي

 freelancestation.net

 علي رشيدي 

22 يونيو 2018

نهاية مقال 5 أدوات للفريلانسر.

مقالات ذات صلة:

كسب المال من التدوين مع ووردبرس من خلال تثمين المحتوى في مدونتك